كورونا في لبنان ساعة بساعة

64336

إصابة مؤكدة

531

وفيات

29625

شفاء تام

21 آب 2020 | 13:34

ثقافة

يا مينا بيروت...

يا مينا بيروت

يا مينا بحرية،

يا قلعة دهرية..

يا موجة من دهب،

ما بتعرف التعب..



*



بقلب المينا،

على شمالها ويامينها،

رياس المينا،

كلهن نخوة وحماس،

رياس من خيرة الناس،

بلطجي والسبع وكعكي،

مكاوي، وشهاب الدين وقيسي..

*





البحر واسع،

والمينا شاسع،

مراكب، وسفن شراعية،

عمال، وعتالة بزنود قوية،

نوتية، ونيشة، وبحرية، وضابطة جمركية..

طالعين، نازلين،

عالصقالات وعالحبال،

حاملين حمل جبال،

بالات وشوالات ومواعين..

تحميل، تفريغ، وتخزين،

قمح، رز، سكر، وطحين،

البضاعة مستفة،

والمخازن مكدسة،

والعنبر كبير، والرزق كتير..

*



الرياس عم يعطوا قومندو:

إنتبهوا ما توقع الحمولة فوندو،

يلا بلشوا بالكميون إللي بعدو..

وأنتو شهلوا شويي،

وعملولكن همة،

اليوم بدنا نخلص،

ونسلم الحمولة للمخلص..

*



بعرض البحر واقف بابور،

ناطر دورو على رصيف البور..



مرشد بيصرخ:

يا ريس،

الهوا شمالي والموج عالي..

ما تخاف يا إبني، السنسول حامي، والفنار ضاوي..

*



التجار حايصة،

وعحيط المينا ناطرة،

والريس مطمن بالو،

وعامل حسابو،

يا خال:

إعتبروها خالصة،

الشغيلة والونوشة حاضرة،

وجهزنا الكاميونات والقاطرة...

قول:

يا معين، خلي ربنا يهونها ويعين..



*

يا مينا بيروت،

يا حجارة من ياقوت،

عبوا العنابر بالموت..

وغرقوا البواخر واليخوت،

وتهدمت حولك البيوت،

وبلعك الحوت،

يا مينا بيروت...

*

زياد سامي عيتاني





يلفت موقع Mustaqbal Web الإلكتروني إلى أنّه ليس مسؤولًا عن التعليقات التي ترده ويأمل من القرّاء الكرام الحفاظ على احترام الأصول واللياقات في التعبير.

21 آب 2020 13:34