وقفة تضامنية مع الحريري في البقاع

حال الطقس العاصف والمثلج على ضهر البيدر دون وصول البقاعيين من جمهور الرئيس سعد الحريري إلى بيروت للمشاركة في الوقفة الداعمة له أمام بيت الوسط، فقاموا بتنظيم وقفة تضامنية في مبنى منسقية تيار المستقبل في البقاع الأوسط في تعنايل.

ورفع المشاركون صور الرئيس سعد الحريري وأعلام تيار المستقبل، وهتافات :" سعد سعد سعد"، بحضور منسق عام البقاع الأوسط سعيد ياسين ومنسق عام البقاع الغربي محمد هاجر وأعضاء مجلس ومكتب المنسقيتين، منسق عام قطاع النقابات العمالية في تيار المستقبل ماجد سعيفان.

وألقى ياسين كلمة جاء فيها: " اليوم مقدّمات ما في، اليوم الكلمة إلكن وبإسمكن، الكلمة لأهل الكرامة والشرف الي قاعدين ببيوتهم مصدومين او الي تحدّو الظروف والطقس ونزلو عا بيروت وعالطرقات ليقولو لوين رايحين، الكلمة للمغتربين وقلبهم عالبلد وناسو، الكلمة بإسم هودي كلهم لسعد رفيق الحريري".

وتوجه الى الرئيس الحريري بالقول: "دولة الرئيس بغضّ النظر عن كل الظروف والمعطيات الي عندك، القرار الي أخدتو أو راح تاخدو غلط،قرار ترك الساحة خاطئ، قرارك بالعزوف غير موفّق".

وأضاف: "دولة الرئيس، بهالمسيرة مرقت ومرقت هالناس معك بكتير صعوبات. ولا مرّة أهلك وناسك إلّا ما واجهو وكانو قدّ المواجهة، أنت قدّرت الظروف وأخدت القرار الي برأيك ورأي مستشارينك هوي الصح، والناس قدّرت الظروف وبرأيها إنو قرارك انت ومستشارينك غلطططط".

وتابع: "هيدي الناس يا دولة الرئيس مش راح تترك، هيدي الناس راح بتكمّل، عا دعسات رفيق الحريري راح "بتكمّل، حفاظاً على لبنان وعروبة لبنان راح بتكمّل.

وقال: "وللقريب والبعيد، وللحليف والخصم المعلن والخفي هالناس بتقول: أوعى حدا يفكّر إنو الساحة السنيّة أرض مشاع، أوعى حدا يفكّر إنو السنّة بينكسرو، أوعى حدا يفكّر إنّو يعمشق عا ضهر هالسنّة، واذا سعد الحريري عزف عن خوض الإستحقاق، السنّة موجودين، ومانهم ساحة لحليف مقنّع أو غيّور مصتنع ليسرحو ويمرحو فيها".

وأردف: "راح نسمع مزاودين ومعمشقين وحالمين وطامحين وطامعين كتير، هودي كلهم كغثاء السيل، ما تهكلو همّ، إنتو ملح الأرض، وإنتو ميزان البلد، وإنتو صمّام أمانو، ورانا بحر كبير من شرق الدنيا لغربها".

وتوجه بكلمة من القلب للمملكة العربيّة السعوديّة، ولخادم الحرمين الشريفين وولي عهده سمو الأمير محمّد بن سلمان: "اللبنانيّون العرب منكم وأنتم منهم.. شئنا أم أبينا، وشئتم أم أبيتم. وتبقى مكّة قبلتنا الدينيّة، والرياض قبلتنا السياسيّة. رغم أنف الحاقدين، وعلى بركة الله نقول: نحن جمهور رفيق الحريري لبنان وطننا والعروبة هويّتنا، ولن نرضى غيرها هويّة لهذا البلد مهما كلف الأمر".