رامي جمال يعلن إصابته بالبهاق: نظرات الناس تؤذيني وأفكر في الاعتزال

أعلن المطرب المصري رامي جمال، عن إصابته بمرض البهاق.

وقال رامي إنه لم يعد قادرا على إخفاء المرض، كما انه لم يعد يتحمل تجنب بعض الناس له بمجرد رؤية بقع البهاق ظنا أن المرض معدي. وأكد رامي أنه يفكر فعليا بالاعتزال.

رامي أشار إلى إنه أصيب بالمرض منذ فترة لكنه لم يكن ملحوظًا من ثم بدأ ينتشر في جسمه بطريقة سريعة ما جعل البعض ينفر منه ويرفض حتى مد اليد للسلام عليه وقال: الحمد لله الذي أحبني فابتلاني وقدرني على الصبر.. من فترة ظهرت بقع بيضاء في جسمي وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة.

وأضاف: رضيت وسلمت أمري لله عشان عرفت إن الزعل بيزوده وكفاية شغلانتي وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللي بقى يقوللي هتتعامل إزاي وأنت فنان واللي يخاف يسلم عليا واللي يسألني هو ده معدي.

وتابع: "أنا بقالي سنة فعلا لو عندي حفلة أو تصوير بتعب على ما أشوف طريقة أخفيه بيها، لدرجة خلت ناس تقولي شوف بيزنس تاني اعمله عشان الناس مش هتقبلك كدة، وفكرت في كلامهم بصراحة.

واستكمل: لقيت إن عندي حلين يا فعلا شكرا لحد كدة على الشغلانة دي رغم حبي ليها وعدم معرفتي بغيرها، يا إما مش هداريه تاني وتقبلوني بيه وترحموا كل اللي ربنا ابتلاهم بيه من نظرة إن شكله غريب، والحمد لله على نعمة الأهل لأنهم الوحيدون اللي بيقبلوا الواحد زي ما هو.

زملاء رامي دعموه وساندوه، وطلبوا منه أن يكون أقوى، كما سانده جمهوره وطلب منه أن يقوم بحملات توعية للتعريف عن المرض بدل الاختفاء وتعزيز فكرة أن المرض معد.